克勤仔話江西農村仲好落後，大小解嘅地方都係旱廁——即係無沖廁系統嘅廁所；臭氣熏天不在話下，更加未必人人敢望。克勤仔話有好多同行嘅女同學頂唔順寧願唔去，但佢身為團長，點都要身先士卒，最多係速戰速決咁話喎！不過克勤仔由同學口中得知，江西有啲小朋友唔止唔怕臭，仲爭分奪秒帶埋書入去讀，令佢深深感受到兩地嘅文化差異，開咗眼界，亦增長咗知識。

不過團長唔易做，當大家喺農民屋企食飯時，班學生見到啲餸畀好多烏蠅圍住，個個都唔敢食，為免失禮人哋，克勤仔惟有再次頂硬上帶頭夾餸，只係咁多碟餸中唯一食得晒嘅，都係班學生自己整嘅意粉，睇嚟香港學生真係要多啲返內地磨練吓至得。