行會召集人梁振英（CY）呢排力谷人氣，做咗搭訕王，日前畀「金勞詹」詹培忠踢爆佢私下表示有意爭特首，搵詹Sir教路後，CY可能醒覺自己講多錯多，即刻封晒口。CY「收口」但唔收埋自己，尋日照樣連跑兩場活動。回應近日「飯局風波」，CY話唔太介懷詹Sir講啲乜，會照約朋友食飯傾偈喎。
CY尋日繼續其逢請必到作風，黃昏出席港大一個有關兩岸四地產權制度嘅研討會，留咗將近一粒鐘就飛身撲去紅館參加文藝晚會。講起叫詹Sir喺飯局中「過招」，CY不置可否，話唔會透露同朋友嘅飯局內容，似乎係暗寸詹Sir「大口」。CY又擺出一副唔怕畀人講的姿態，話唔會因為「篤爆事件」變低調，會繼續約好友食飯，唔通真係見過鬼都唔怕黑!?
CY頻頻出席活動爭曝光，但講到本月十二日嘅牛一大日子，就話要低調慶祝，原來呢個係梁家傳統，不論係CY自己或者仔女生日，只會買個小蛋糕返屋企低調地切餅，唔搞生日派對。嚟緊生日，佢唔會外遊，留港同太太過二人世界。