大家唔好以為淨係民間商家佬先至會搵笨喎，官方大寶號其實同樣蠱蠱惑惑。即係咁，名義上係職位空缺，實際上有職位冇空缺，就好似龜苓膏有龜冇苓。唔明？咁就要講古仔嘞。

話說環保署透過勞工處刊登招聘廣告，講明有職位空缺，聘請月薪三萬二千元嘅行政經理。有一位賴小姐，報名應徵啦，經過勞工處安排，仲預約咗面試添。點不知，奇怪嘅事情發生嘞，賴小姐忽然收到環保署職員電話，話原本嘅面試取消咗喎。更加奇怪嘅係，招聘廣告即日刪除！

據賴小姐所講，環保署係連佢嘅履歷都未睇過嘅，即係話署方根本唔知道應徵者有幾多斤両。到底發生乜嘢事呢？面試點解取消呢？廣告點解刪除呢？唔使出動神探伽利略都可以推論得出一個好有嫌疑嘅陰謀，所謂招聘廣告係假嘅，環保署根本一早有內定人選，賴小姐上咗當，幫人做咗一齣戲。呢嗱嗱嗱，呢啲就係鼎鼎大名嘅黑箱作業嘞，亦係香港官場習以為常嘅私相授受，自己人益自己人。

明白冇？環保署嘅職位空缺，就好似全無土茯苓成分嘅龜苓膏咁，只有職位，並無空缺。

講到自己人益自己人咯喎，功夫茶仲有一個古仔可以提供。深水埗民政事務處有一名月薪大約一萬元嘅二級工人，竟然可以做兼職做足十九年，兼任時薪三十四元嘅助理社區幹事，長期兩份人工。難得民政總署夠坦白，佢哋一方面表示，員工兼職有效期一般只係六個月，另一方面又承認，的確有人兼職長達十九年。規矩係六個月，實際係十九年，一個咁匪夷所思嘅古怪現象應該點樣解釋呢？民政總署梗係唔肯講啦，不如又由功夫茶扮一扮神探，邏輯推論一下：嗯……嗰個二級工人肯定係好有人緣嘅，尤其深得上司愛戴，而佢嘅上司又係好有人品嘅，非常痛錫下屬，姣婆遇着脂粉客，相親相愛十九年！

唉，長期兼職呢家嘢其實可大可小，大家睇睇平日撞到鬼哭神號嘅奪命車禍吖，十之八九係因為司機過度疲勞，有人身兼兩職，有人身兼三職，鐵人都會瞌眼瞓啦！

弊弊弊，家陣連曾蔭權都有兼職，撈埋禁毒專員嗰瓣，會唔會過度疲勞瞌眼瞓㗎？記住喎，撞板好喇，唔好撞車！