前經濟發展及勞工局局長葉澍堃（Stephen）退出政府呢個「熱廚房」後，生活優哉游哉，周遊列國搵好嘢食，仲做埋攝影師影低各類美食，同大家分享，簡直變了另一個人。曾經戲言依家「專職搵食」嘅Stephen，今次升級做美食大賽督導員。事緣職訓局旗下嘅中華廚藝學院舉辦「2009美食之最大賞」，搵咗Stephen做督導委員會榮譽委員，Stephen嘅職責就係睇住個比賽在公平公正情況下舉行。
Stephen咁識食，會唔會踩過界做埋評判呢？尋日佢出席有關記招時就好謙咁話，一切都係等大會安排，仲話大會可能只係貪佢鍾意食嘢，先搵佢嚟喎。不過一講開食，Stephen就講唔停口，仲過兩招教大家點享受美食添。Stephen話呢個世界無話甚麼至係美食嘅統一標準，每個人只要食入口就會知道好唔好食，最緊要自己鍾意喎！咁講法，人人都可以做食評家喇。
今次有份擔任評判仲有做《美女廚房》做到出晒名嘅周中師傅，Stephen見到周中師傅就即刻捉住佢約食飯；Stephen同咁多位大廚都咁老友，唔驚無好嘢食啦！