立法會早前幾經波折，先請到資深大律師麥高義幫佢哋打梁展文專責委員會單官司，點知新世界方面又再變陣，除咗原有嘅資深大律師兼前立法局主席施偉賢之外，仲喺英國請多咗位知名御用大律師Dinah Rose來港幫手，令立法會亦被迫要加碼招兵應戰，財政壓力進一步加重。
立法會最終喺英國請到御用大狀Anthony Lester來港助陣，佢同新世界聘請嘅Rose來自同一間律師行，但地位同資歷就高對方幾班，係著名憲法同人權法專家。據聞佢仲係以友情價幫立法會，律師費連機票食宿「全包宴」都唔使一百萬港元，以佢嘅殿堂級身份嚟計絕對超值，令立法會鬆一口氣。
有法律界人士分析，Lester近年已處於半退休狀態，就算有錢都未必請得到佢，可能呢單案對香港憲制發展影響深遠，一旦贏咗足以名留青史，佢先會願意以友情價出山。
不過亦有人話Lester年事已高，所以估計佢主要出橋居多，最後上庭抗辯都係由麥高義做主力，同新世界一樣係一老（施偉賢）一少（Rose）搭檔，以律師團陣容計算係打個平手。