立法會暑假休會，好多議員都外遊輕鬆吓，但梁家傑就要犧牲暑假陪太子讀書，唔係講笑，佢呢幾日會同太太帶一對孖仔到英國上暑期課程，熟習吓英國嘅讀書環境，事關今年九月新學年推行嘅三三四學制，傑哥對孖仔咁啱又係升讀中四，成為新學制首批白老鼠，搞到傑哥憂心忡忡，思前想後，最終決定安排對孖仔試讀一年中四，然後再轉到英國繼續修讀餘下高中及大學課程。
袋巾傑話，對孖仔去到英國讀書，話唔定成績好可以跳級直升中六，慳番一年時間讀中五，加上大女已經在英國準備升讀大學，可以照顧兩個細佬，叫做有個照應。又好難怪袋巾傑對新學制投不信任票，皆因新學制下考試無先例可循，完全捉唔到路，淨係睇通識科，連才子都被玩殘，所以就算讀書幾叻都好，都好難預計考得好唔好，完全無把握。
講番袋巾傑個大女，就已經選定大學修讀政治、心理學和社會學，取得學位後再選讀其他學科。傑哥對女兒想法深表認同，他認為十八、九歲一開始就修讀法律會太專，可能對社會事務認知度不足；記得當年自己入港大讀法律時，都遇過同樣問題，但好彩有機會參加學生會事務，以補不足之處。