八名副局之中，有兩人喺上次四月進行嘅調查中錄得「零認知」。不過本月中進行嘅新一輪民調，就顯示七名副局嘅認知率都有所上升，只有民政事務局副局許曉暉逆勢下跌，冇人再錄得「零認知」，整體表現似乎好咗啲。不過，實情係認知率最高嘅商務及經濟發展局副局蘇錦樑同教育局副局陳維安，亦分別只得百分之三點一同百分之二嘅受訪市民噏得出佢哋個名，而且兩人認知度上升，好可能同兩人分別爆出卡片風波同畢業禮風波有關，今次多人識都未必係好事。

九政助中五人「零認知」

至於九名政助當中，上次有三人錄得「零認知」，今次增加到五人，包括食物及衞生局政助陳智遠、發展局政助張文韜、環境局政助蔡少綿、保安局政助盧奕基同民政局政助徐英偉，即係有過半數政助都冇人識。即使畀受訪市民噏出個名嗰四位政助，認知率亦全部不足百分之一。佢哋每人每月都攞緊十幾萬銀公帑做人工，咁嘅表現明顯唔合格。

調查仲問到十四名非官守行會成員嘅表現，結果整體認知度比班副局同政助好好多，但民望評分就全線大跌，由下跌六分至九點七分不等，得港交所主席夏佳理一個得分超過五十，消委會主席張炳良、疑似特首候選人梁振英、工聯會會長鄭耀棠同民建聯副主席劉江華都只得四十幾分，鄉議局主席劉皇發更連四十分都唔夠。不過調查就冇分析到班行會成員評分急跌，到底係同佢哋個人表現有關、定係畀煲呔曾嘅施政失誤拖累喇！