三大親建制青年團體尋日喺灣仔君悅酒店閉門見南下香港訪問嘅中央官員，又係有志從政嘅名人富豪二、三代表現自己嘅機會，好似「四叔」李兆基大公子李家傑、「霍老」霍英東長子嫡孫霍啟剛、福建幫頭領施子清四公子施榮忻、「賭王」何鴻燊女兒何超蕸、信置黃志祥兒子黃永光同大興紡織太子爺陳仲尼咁，大家齊齊亮相，多到數唔晒。值得留意嘅係，睇番份官方出席名單，排首位嘅係身兼百仁基金主席嘅李家傑，第二係菁英會主席施榮忻，再到新任香港青年聯會主席陳仲尼。
先會見李家傑施榮忻
有機會踏上從政路嘅名人富豪二代，尋日喺君悅門口可以一網打盡，有份出席嘅有三十人，除咗一班大孖沙接班人之外，仲有觀瀾湖太子爺朱鼎健、上屆香港青聯主席許華傑、理文造紙李文俊同莊士集團太子爺莊家彬等，會面歷時四十五分鐘，點知之後作鳥獸散離開，一律封口，有啲仲經後門出入，刻意避開傳媒。名人富豪二代三緘其口，不過唔緊要，卓妮喺現場攞到本會場派發簡介三大青年團體嘅場刊，順序介紹係菁英會、香港青聯同百仁基金，出席名單嘅排位，菁英會阿一亦高過青聯，唔知有乜政治含意？
十六字真言面授機宜
卓妮八到，李家傑本身係中華海外聯誼會副主席，聯誼會同訪港京官正好係對口單位，而青聯則直屬團中央，所以李家傑排名第一好正常；至於施榮忻何解排第二，就要搵高人解讀喇。
其實京官特別抽時間見呢班名人富豪二代，睇得出中央對香港青年工作嘅重視，亦肯定有嘢要講。卓妮向施榮忻請教，佢話京官以十六字真言面授機宜，寄語佢哋要「愛國愛港，積極進取，團結拚搏，開創未來」，希望大家秉承父輩精神，多做利民之事，多思利港之策，海納百川，廣泛團結香港青年朋友。簡單嚟講，即係中央睇重呢班名人富豪二代嘅背後力量，希望愛國力量後繼有人。施榮忻話，菁英會將會因應最新國情發展，成立兩岸和平發展研究會同民族和諧研究會，睇嚟菁英會有意大搞；香港青聯一向根基雄厚，嚟緊亦會發圍，破天荒揼錢搞政策研究，就特區政府重大政策發聲，睇嚟呢班青年人都想騷騷Quali噃。
卓妮