青少年濫藥問題未解決，少女援交問題又成為全城熱話，究竟何謂「援交」？就連前商務及經濟發展局局長馬時亨都被考起。肥亨尋日客串做電台節目主持，自爆話好似佢呢輩成熟嘅人，以前根本唔識乜嘢叫「援交」，一直只當係互聯網上結識網友，後來向朋友求教，才得知「援交」一詞源於日本，並非識朋友咁簡單，好多時涉及金錢上嘅性交易。
對於發生十六歲援交少女被殺害後肢解悲劇，作為虔誠嘅基督教徒嘅肥亨話感到震驚和痛心，援交問題如此嚴重，主要關乎青少年過分追求物質，以援交賺取金錢。對於時下家長要搵食無暇照顧子女，肥亨就話：「回想成長時，我媽媽一日做十五至十六個鐘，返完工廠，仲要幫人做挑褲腳，但我哋成長都無學壞，就係因為阿媽經常灌輸正確觀念。」
肥亨認為，如果少女最初在網上只以結交朋友為名，警方好難去執法，所以治本方法應由家長向子女灌輸正確嘅道德價值觀，他相信無一個父母想自己女兒去賣淫或變壞，而學校道德教育亦相當重要。