卓妮尋日見到李主席，講開籌款情況，佢話一年一度嘅賣旗活動本來係東華「生招牌」，舊年賣旗日遇着打風依然籌到幾百萬，可見東華支旗有一定捧場客。可惜今年唔夠運，抽籤落空無緣賣旗，惟有急急補飛，以「籌款承諾機制」終於向社署攞到一日檔期。當日賣旗由上午八點至中午十二點，半日內要「撲水」五百萬港元，真係賣旗都賣到手軟。

李三元嘆不敵o靚模

李主席話，賣旗當日會動員多啲學生及義工，出動人海戰術，務求「跑夠數」，否則東華明年喪失賣旗資格夠淒涼嘞。佢又慨嘆，時下後生仔對東華認識唔深，較少捐錢畀佢哋，就連東華搞活動都吸引唔到年輕人。佢舉例話，東華上周喺奧海城搞活動，呼籲人關注柏金遜症，結果場面冷冷清清，反而同場有一班G模搞宣傳活動，三扒兩撥吸引大批G仔捧場。

東華招牌雖大，都敵不過G模，李主席只有嘆句：無奈也！

卓妮