Michael依家係中出秘書長，消息話，Michael本來可以做副會長，但係佢情願做掌實務嘅秘書長，希望了解更多商會運作同情況。許嘅父親係前港進聯成員、前中出會長許長青，許長青喺九七年回歸後一直做出入口界立法會議員，後因患癌去世，大象哥○四年接棒，代表中出坐入立法會至今，依家Michael有機會隔代接父棒，睇嚟佢要把握機會，加把勁至得。

至於阿Rock，由於長期參與青聯工作，同城中富豪第二、三代稔熟，做投資生意，太太係前歌手區海倫，最近更成為香港青聯主席，坐上進入全國青聯嘅直通車，極有機會順理成章進身全國青聯副主席。熟悉國情嘅人都知，全國青聯與中央「共青團」關係極之密切，係港人躍身內地政壇嘅大跳板，阿Rock呢次可以話執到支好籌。

入議員辦事處做義工

香港青聯每年換屆，但係全國青聯就五年一屆，今年底正值換屆，其實，阿Rock本嚟上年已經可以執掌青聯，但係潛龍勿用，畀Michael做先一屆，等到今年先至上位，佢會接替前全國人大常委曾憲梓兒子曾智雄，做全國青聯副主席，似乎已勢在必行，呢個安排唔知同中出物色立法會代表接班人有冇關係呢？

中出消息就話，Michael同阿Rock暫時叮噹馬頭，平分秋色，邊個跑出，要睇佢哋嘅造化，嚟緊兩人都會被安排去大象哥嘅立法會議員辦事處做義工，熟悉議會運作，唔講唔知，呢個安排好重要，當年大象哥就係因為長期為許長青做議辦顧問，一切駕輕就熟，後來才會順理成章咁接棒，依家輪到兩個後生仔辛苦吓都好應該嘞！