「大拿拿廿五萬，無端端入咗落法援署署長個戶口，有冇搞錯呀？」張先生談及事件經過時仍餘怒未消。張兩年多前將座駕駛入上水一停車場時，前車突然失控倒車，張之座駕應聲被撞，車頭嚴重損毀，而張的頸、腰及腳均嚴重受傷，事後獲醫生簽發逾一年病假。張透過民事途徑向肇事司機索償，勝訴後獲賠廿五萬元。

直斥錯得離譜

張指涉事司機遵照法院判決，將賠款存入區域法院會計部，而其代表律師則於今年二月起，多次向區域法院會計部申請取回有關賠款，但會計部卻遲遲未能發出支票。

為追回賠款，張只好親自查詢，惜仍不得要領，「我覺得好奇怪，人哋都賠咗錢，點解咁耐都收唔到？打電話去問啲職員又唔肯答，仲叫我有乜事就要搵律師去問喎！」張與其代表律師自今年二月起不斷催促法院會計部交代，直至四月底才取回賠款。

事件中，區域法院會計部誤以為張乃綜援受助人，並將支票抬頭寫為「法律援助署署長」，令張一直未能取得賠款，「我真係唔敢相信法院竟然會犯咁大意嘅錯誤，我從來冇申請過法援，有乜理由錯得咁離譜，啲職員又唔肯正面答我，真係過分！」

有損法院形象

司法機構接獲本報查詢後逾兩個月才回應事件，發言人承認職員在處理上述個案期間，在安排款項轉移過程中出現「人為錯誤」，以致誤發以「法律援助署署長」為抬頭的支票。發言人解釋，由於當事人聘有代表律師，故當張先生向區域法院會計部查詢時，職員便按一般程序，建議張自行向代表律師查詢。司法機構已就事件向張先生詳細交代及致歉。

「一啲行政上嘅錯誤好可能已經影響法院嘅形象，香港市民一向對法院有信心，呢啲行政錯誤可一不可再，如果苦主要等錢開飯咪死得？」新界東立法會議員陳克勤認為，司法機構政務處有必要認真審視現有行政程序是否存在漏洞，「唔可以一錯再錯」。

賠款不可私下交收

律師黃國桐解釋，經法庭判決的索償個案，倘涉及龐大金額，法庭會要求敗訴人在限期前將賠款存入司法機構會計部，再由司法機構將賠款轉交勝訴人。有關安排目的乃方便法庭了解敗訴人有否遵守法庭命令；若敗訴人在限期內仍未存款至司法機構，將會被視作「藐視法庭」論。黃說：「法庭判決有權威性，所有人都要遵守，唔做就係犯法！亦因為法庭要知道有冇人唔聽話，所以唔可以私下交收。」

記者 許紹基