財經事務及庫務局局長陳家強以為有水抽，即刻彈出嚟話回購方案為迷債投資者提供一個切實可行嘅解決途徑，彰顯咗證監會和金管局嘅監管能力，減少咗不必要嘅訴訟。唉，陳家強扮救世主亂噏廿四，難怪人哋叫佢做傻強啦！

咪以為求其有個和稀泥嘅回購方案就可以拆炸彈，當呢個方案一提出，即刻惹嚟雷曼苦主劣評如潮，好多人大嗌唔收貨。查實呢個回購方案唔單止冇彰顯證監會及金管局嘅監管能力，反而仲令人睇清楚呢個政府係幾咁廢！

正如雷曼苦主大聯盟召集人陳光譽話齋，呢個回購方案係「三無方案」——「無公開譴責、無點出結構性不良銷售問題、無百分百賠償」，佢一語中的，點出咗成個回購方案嘅問題所在。

事實上，消委會表示有幾宗個案接近訴訟階段，將會繼續跟進；而立法會調查雷曼事件小組嘅工作啱啱進行咗一半，亦會繼續傳召證監會官員解畫，證明事件仍然未解決啦！

咁就梗係啦，之前有證券公司同證監會達成協議，向客戶百分百回購迷債，因乜事其他投資者只可以攞番六至七成本金？而更離譜嘅係，喺呢個回購方案之下，被界定為專業或經驗投資者嘅客戶仲冇得賠添。「經驗投資者」嘅定義係乜呢？據講係喺同一間銀行進行過五次高風險交易，但點解規定五次呢？冇人管得到。好明顯，所謂經驗投資者嘅定義根本唔清唔楚，對苦主非常唔公平。

舉個例，有個苦主長期喺同一間銀行投資，最後被界定為經驗投資者，斗零都冇得賠。但另外有個喺幾間銀行分開投資嘅苦主就有得賠，同人唔同命，叫苦主條氣點順吖？

更大嘅問題係，到底家陣雷曼迷債抵押品嘅價值仲有幾多，苦主都蒙在鼓裏，乜都唔知，究竟接唔接受回購，叫人點選擇呢？當局黑箱作業，搞咗個唔清唔楚嘅回購方案出嚟，就想叫苦主收貨，唔怪得被人指霸王硬上弓啦。

講到底，喺歐美國家，雷曼迷債呢類屬於高風險嘅金融衍生產品，只係賣畀有專業知識嘅機構投資者，但係香港就唔同嘞，包裝成低風險嘅債券，推銷對象竟然係老弱婦孺，擺到明係有關部門嘅金融監管出咗問題啦。

所以呢，對無辜嘅苦主作出賠償固然重要，但計功夫茶話齋，最重要係無論苦主接唔接受回購都好，當局都要繼續調查到水落石出，一定要對違規嘅銷售行為追究到底，仲要向失職官員問責。否則，香港嘅法治精神仲使要嘅？法治都死埋咯，呢個所謂國際金融中心地位實瓜直啦！