本文重點
台港關係持續升溫，香港親中陣營聞歌起舞，由全國政協常委楊孫西牽頭，搞咗檔中國和平統一促進會（和統會）香港總會，楊做理事長，港區政協委員高敬德做會長，盧文端做秘書長，聽講已經籌到四千萬元做啟動經費，會址喺中上環商廈高層，下星期四正式成立。不過，呢個會未成立就引起爭議。
立法會主席曾鈺成答應為總會做會務顧問，就惹起爭議。民主黨何俊仁質疑和統會係高度政治敏感組織，曾鈺成唔應該擔任任何職位，以免影響立法會嘅政治中立同公信力。而曾鈺成就以書面回應話，唔會同立法會主席嘅角色有矛盾。
白鴿黨五十步笑百步
曾鈺成都算惹火，做咗立法會主席一年，非議聲音時有所聞，除和統會香港總會單嘢，民主黨尋日叫佢遵守當日選主席時講過唔會公開評論時政嘅承諾，擔心影響立法會主席嘅中立性。不過，民主黨都唔好得去邊，黃成智喺立法會選舉中虛報社工一職單嘢，到依家都未解決，分分鐘搞到廉署介入都未定，簡直係「五十步笑百步」！