咬實韋奕禮鬍鬚曾

雷曼回購方案令雷曼苦主又愛又恨，立法會研究雷曼事宜小組委員會尋日開過閉門會議，決定因應事態發展再度傳召韋奕禮，開會次數未知，不過睇回購方案嘅回響，加上事件影響萬千苦主權益，相信韋奕禮呢個暑假都幾唔得閒嘞。小組委員會尋日亦敲定，韋奕禮之後，就會傳召財政司司長曾俊華作供，直指鬍鬚曾身為財爺，喺雷曼迷債風波中，有一定角色，無理由完全置身事外。

立法會有特權法呢把尚方寶劍，只要傳召令一出，韋奕禮同鬍鬚曾就要乖乖報到，反而，議員湊唔湊得夠開會法定人數，先至係今次立法會能否把握時機、咬住回購方案唔放嘅關鍵。

小組委員會有委員廿二人，法定開會人數至少七人，除主席何鍾泰外，仲要搵多六個委員。咪以為好易，小組委員會本來早喺廿一日煞科，等抖完暑再戰江湖，唔少委員一早安排咗外遊計劃，好似會計界陳茂波咁，廿八日同家人飛英國旅行，連機票都訂埋，無得改；有啲就有公幹，好似「卿姐」劉慧卿要離港參加聯合國種族問題會議，所以，依家小組委員會臨時加場開工，隨時因為湊唔夠腳而流會㗎。

不過，我哋問過議員，至少有七名議員回覆，雖然小組委員會已經收爐抖暑，但既然決定再度開爐起鑊，佢哋寧願有假唔放，都會喺議事廳揸定鑊鏟，侍候韋奕禮。「潮州甘」甘乃威話，本來約好老婆喺八月三日飛捷克布拉格旅行，一知道小組委員會要開會，尋日已經同老婆報定案，隨時要因應開會日期，提早結束行程，或者揼低老婆喺捷克，自己先行返港；若然月底舉行會議，更加冇問題。陳健波個仔八月中會返香港，即係八月中前，佢一定喺香港。梁家騮就話，佢早已預咗每逢周三、周五開立會，所以只要喺呢兩日開，佢都冇問題。李慧琼亦話，七、八月檔期排到密麻麻，但都會盡量出席會議。議員唔放假都要奉陪韋奕禮，韋奕禮就算被圍攻多幾次，都應該心甘命抵啦！