青年工業家協會尋日舉辦大專生培訓招聘會，榮譽會長蔡志明不但慷慨借出九龍城廣場作為招聘場地，仲親身帶埋乖仔蔡加讚捧場。蔡老闆一直信磚頭多過信股票，更加唔睇好呢個升市，佢承認自己相對悲觀，認為整體經濟市道未正式轉好，覺得起碼要兩年後才能復甦。

其實又難怪蔡老闆咁睇淡，因為佢同好多廠家一樣，都要面對定單下跌嘅苦況。蔡老闆對卓妮講，今年初旗下玩具生意下跌三成多，踏入七月玩具定單旺季，定單跌幅都有兩成多，仲跌得多過○三年沙士最艱難時期，廉價玩具定單數目仲保持到，貴價玩具定單就顯著減少，證明消費者購買力薄弱。

指樓市抗跌力強

至於樓市抗跌力強，蔡老闆話原因有兩個，一是內地人鍾意來港買嘢，二是香港利息低，港人索性投資物業保值，但佢憂慮將來經濟好轉會加息，所以佢寄語市民置業前要考慮埋加息後是否仍然負擔得起。

講番尋日個招聘會，蔡加讚眼見咁多大學生搵工，佢憶述在美國讀高中時都試過搵工做，曾經到一間車行見工，當時好擔心車行唔請佢，但最後都獲聘。加讚之所以搵車行工，主要係佢對汽車有濃厚興趣，連汽車維修都學過，佢仲話揸過晒父親收藏嘅名車，當中最鍾意就係價值四百多萬嘅林寶堅尼Murcielago，但最愛嘅當然係蔡老闆買畀佢嘅二千萬林寶堅尼Reventon啦！

卓妮