政壇名人興趣多，個個都係百足咁多爪，全國政協委員蔣麗芸（Ann）呢個暑假都計劃去牛津大學進修。阿Ann本身係博士學生，「沙紙」多到貼滿屋，但為咗提升生活品味，月前上網報讀英國牛津大學一個教你如何欣賞維多利亞式建築設計嘅貴價暑期班，可惜全球經濟受金融海嘯影響，呢類高檔課程變成「拍烏蠅」，校方通知佢，因為收生不足開唔成班，搞到阿Ann做唔成牛津生！
阿Ann尋日出席所屬政黨茶敍，介紹黨內婦女事務委員會一眾新委員，新主席係政壇新星兼沙田區議員葛珮帆，佢就退下火線做副主席。嚟緊有乜新搞作？阿Ann話呼籲姐姐妹妹站起來，既要學識愛自己，亦要熱愛生命同地球。佢本人就身體力行享受人生，兩個月前攞三萬幾蚊港紙出嚟報讀牛津暑期班，一心想體驗吓歐洲文化氣息，課程只得三個禮拜，收費絕對係五星級，可惜最終讀唔成。
做唔成牛津學生，阿Ann暑期疊埋心水跟黨友考察珠海，八月再跟班政協考察貴州。佢又自爆近日秘密練兵，嚟緊同班婦協阿太喺八月二十八日粉墨登場表演，阿Ann賣關子話會反串做古裝，至於婦協主席林貝聿嘉就會帶住一班阿太表演打山西鼓，演出節目咁有突破，真係要拭目以待嘞！