觀塘繞道上演一場六國大封相，十幾架車炒埋一碟。事緣有人半夜三更非法賽車，警察叔叔唔知應該讚佢足智多謀吖，定係要鬧佢草菅人命，居然截停五架車當作「人肉路障」，企圖阻擋一班飆車死飛仔。你知啦，但凡非法賽車梗係個個膽正命平自以為無敵車神㗎啦，架車開到有幾辣得幾辣，淨係識踩油門，好少會踩腳掣，結果咯喎，成班死飛仔好似盲頭烏蠅咁撞到橫七豎八，部分連轆都甩埋。

有啲車手唔係技術未到家，而係慌不擇路，索性主動撞過去，撞出一條逃之夭夭嘅緊急通道。總而言之，一個路障，撞到飛起。

死飛仔撞車本來係唔抵可憐嘅，不過最慘係無辜辜臨時拉伕嘅「反飛車敢死隊」。喂，人哋咁啱路過㗎咋，呢個揸貨車，嗰個揸的士，有個揸私家車，好人好姐奉公守法，因乜事幹要受到無妄之災？今次大話夾好彩只係車毀啫，假如一個唔覺意導致人亡，點算？

計功夫茶話齋，咪嘞，以後揸車見到警察叔叔擺路障示意停車，為咗穩陣起見，點都要絞低車窗問一問：阿蛇呀，係咪要執法打擊非法賽車行動呀？如果係嘅，冇人話唔停畀你，費事你當我係通緝犯，不過你起碼都要畀我落車企埋一邊吖，唔該！

好彩警隊一哥鄧竟成反應都算快咋，佢隔咗冇耐即刻企定定公開致歉，承認當時警察嘅判斷出咗問題，如果唔係咯喎，功夫茶真係思疑「徵用人盾」係警隊特准嘅常規做法。試諗諗，既然擋賽車可以徵用人盾，擋子彈係咪一樣可以照辦煮碗呢？你作為一個路人甲，假如咁啱撞正警匪槍戰，咁啱身邊又有個差人，你隨時會被徵召抗賊，成為警察嘅人肉避彈衣！

話時話，一哥係就係致歉嘞，不過似乎隻字不提賠償問題喎，壯烈犧牲五架車嘅車主應該搵邊個算帳？人哋職業司機好慘㗎，手停口停，家陣架車撞到溶溶爛爛，被迫停工，呢條數又點計先？

有人可能會話，警察截停車輛故意造成塞車，一直都係常見嘅做法，有時係為咗捉賊，有時係為咗打擊非法賽車，只不過今次唔好彩，先至炒到咁大鑊啫，冇人估到成班死飛仔停唔到車撞埋一堆吖嘛。呢個講法似是而非，表面上言之成理，實際上狗屁不通。

喂，外國好多地方明文規定，警方打擊非法賽車唔准飛車追逐，因為太危險嘞，好容易傷及無辜，只可以用比較安全嘅辦法，例如路面設置機關拮爆車胎。今次事實證明，截停車輛亂擺人肉路障係極之危險嘅，警察以後唔可以再係咁野蠻兼混帳，除非徵用人盾嘅目標車輛有個一號車牌，而且司機咁啱係一哥！