亞洲電視和無綫電視之間嘅爭拗升級，亞視新任行政總裁胡競英月初在立法會上，炮轟「有壟斷地位的電視台」定下不成文規則，令不少藝人和歌手未必可以同亞視合作，當時影視及娛樂事務管理處處長鄭美施就話，亞視如果要投訴無綫，必須向廣管局提供更多資料。亞視主席張永霖尋日以港大專業進修學院董事局主席身份，與院長李焯芬齊見傳媒，本來打算講吓學院未來發展私立大學嘅大計，張永霖仲一再聲明：「今日唔講亞視喇，一講亞視就好容易亂講嘢。」
不過講完一輪專業進修學院嘅話題後，又不知不覺講咗去亞視。張永霖自爆話：「我哋已經搜集咗好多資料，進程理想。」至於如何理想，佢就冇具體講，只係一再強調，電視台應該盡量喺娛樂、資訊、教育之間取得平衡。佢仲突然對着李焯芬話：「亞視可以同港大專業進修學院合作，喺亞視搞番個教育節目，你話好唔好？」李焯芬畀張永霖突然一問，有點措手不及，惟有好客套咁話：「好，有得諗！」無綫同亞視拗手瓜，睇怕未有咁快知分曉；但李焯芬都幾無辜，無端端畀張永霖擺上枱！