入境處處長白韞六因為姓氏同名字較特別，上任以來經常畀人誤會佢係才女白韻琴嘅親戚。處長早幾日出席一個政黨會慶酒會，又再畀人追問身世。白處長不嫌其煩咁話：「以我所知，白小姐係廣西人，我係福建安溪人，我哋唔同鄉下㗎。」言下之意，即係大纜都扯唔埋，又點會係兩姐弟噃！
白Sir自爆身世，話自己係百分百福建人，雖然生於香港，連鄉下都未返過，但福建人嘅習俗佢都學到唔少，佢同唔少鄉里一樣，鍾意飲鐵觀音，閒來沖番杯茶潤吓喉，怪唔得皮膚又白又滑。卓妮趁機請教佢點揀靚茶葉，佢謙稱話：「我唔係好識品嘗㗎咋！」
卓妮轉轉話題，問佢點睇近日無綫熱播以入境處為題嘅電視劇集《ID精英》，白Sir諗咗一陣然後點頭話：「收貨喇！」原來劇集開拍前，曾經同白Sir打過招呼，得入境處同意先拍得。唔知白Sir有冇私底下過啲堅料畀編導呢？
不過睇怕白Sir忙到連睇電視都無時間。講起暑假去邊度充電，佢扁嘴話：「邊度都唔敢去喇，老闆（李少光）都唔放假，我又點敢放假呢！」