本文重點
已故全國政協副主席霍英東一生有三寶，就係商業王國、體育事業及開發南沙夢，隨着霍家第三代人才輩出，亦要逐步分工接班。卓妮講過霍家長子嫡孫、霍震霆長子啟剛接手南沙搞教育產業，至於二仔啟山執咗乜嘢好籌，一直都係估估吓；起初以為佢專責霍家嘅社會服務，但原來佢被委以重任，全力負責家族內地房地產生意。
香港國際機場往返南沙港渡輪服務尋日舉行啟航禮，機管局行政總裁許漢忠出席外，代表霍家嘅霍震霆、震寰及震宇都有出席，啟山就殿後處理一項重要任務，就係擔大旗做導遊帶領一眾主禮嘉賓，參觀霍英東集團旗下嘅南沙發展項目及未來新計劃。卓妮見啟山西裝骨骨，言談有板有眼，參觀完畢後仲到酒店咖啡閣會見傳媒添。
畢業兩年 歸隊幫手
啟山話，兩年前在英國倫敦大學畢業後，就到美國紐約幫「高盛」打工，回港後又到一家小型投資銀行工作，最近就歸隊幫手打理家族集團生意，負責廣州及南沙兩地房地產，經常中港兩邊走，好似尋晚咁，要由南沙趕返香港，以小型足球總會會長身份，籌備活動迎接東亞運動會。
至於接班分工係咪小霍安排？啟山答得成熟又大體：「自己對地產有興趣，南沙發展又係霍老先生嘅夢想。」相信小霍聽到肯定安樂晒。
卓妮