煲呔曾尋日入大埔做禁毒騷，下午兩點十分，佢坐住CE座駕，駛過中環長江中心對出嘅電車路，打算借道立法會停車場，點知遇上一架電車唔讓路，幫煲呔曾開路嘅一架交通警車，唔知係被電車揩到、定係自己冇停車閃避，突然跣胎，瞓咗喺條街度，場面都幾尷尬。警方發言人證實，當時開路交通警正沿德輔道中西行，與一架相反方向前行嘅電車發生輕微碰撞，無人受傷，肇事原因仍在調查之中。

開路交通警為咗煲呔曾跣咗一交，當CE車緩緩從後駛過，坐喺後座嘅煲呔曾表露好奇天性，隔着窗睇熱鬧，但無落車；反而電車司機就即刻落車扶起交通警，表現得有人情味好多。交通警失驚無神跣胎，可能連佢自己都百思不得其解，不過，煲呔曾應該心中有數，知道命運玩緊佢。

民望勁插水 頭頭碰着黑

就喺開路鐵騎跣胎前一粒鐘，港大公布民調，顯示煲呔曾嘅支持度，喺半個月前反彈後再度急瀉，支持佢出任特首嘅比率為四成，跌咗五個百分點；反對率為四成五，升六個百分點，係佢上任特首以來嘅新高。港大民調呢頭公布完煲呔曾民望急跣胎，煲呔曾喺中環即刻遇上交通警罕有跣胎事故，真係咪話唔邪！

煲呔曾一個鐘頭內接連遇上兩宗「跣胎」事件，可能因而心神恍惚，跟住入大埔同年輕人見面，又出現蝦碌場面。社工安排咗六位參加咗運動社區發展計劃嘅年輕人，同煲呔曾傾偈，其實呢六位年輕人並非濫藥邊青，只係平日沉迷打機，成績較差兼同父母關係欠佳而已，但煲呔曾一坐低，就當正佢哋係曾經沉淪毒海嘅迷途羔羊，話知道當中有人濫藥，叫大家將脫離毒海嘅經驗，向身邊同學分享。煲呔曾話：「你哋講一句，好過我講十句！」搞到成班年輕人明明身家清白，夾硬啃咗濫藥死貓。