話說當局為咗要保護古樹名木，於是喺○四年九月推出一個《古樹名木冊》，由康樂及文化事務署、漁農自然護理署以及房屋署選定咗五百多棵樹木。聽落個名好似好勁咁，以為棵棵都係千挑萬選嘅古樹名木啦。點知上個月有人踢爆，古樹名冊上有一棵朴樹照片，竟然係另一棵樹嘅「遺照」。查實呢棵張冠李戴嘅古樹名木，老早已經喺○四年被人斬咗，而最搞笑嘅係，呢棵並唔係乜嘢古樹。康文署擺晒大烏龍，而且一錯就錯足五年，如果唔係畀人踢爆，可能繼續錯落去添！

康文署呢劑斷到正，喺撐無可撐嘅情況下至承認係登錯相，亦證實被斬嘅朴樹其實唔係古樹名木。唉！一棵樹咁簡單都可以搞錯，可見康文署做嘢係幾咁烏龍同兒戲吖。

有立法會議員批評康文署一錯再錯，唔單止令人對《古樹名木冊》嘅可信性存疑，仲懷疑康文署唔知係咪為咗要掩飾亂咁斬樹，存心造假欺騙市民。

話時話，小市民又點會咁易受騙吖？係人都知呢個《古樹名木冊》認真得啖笑，如果唔係，又點會搞到香港嘅古樹名木所餘無幾，危樹枯木就周街都係？

呢嗱，去年就有一個十九歲港大女生喺赤柱畀樹壓死，一棵樹好好地做乜會自己冧落嚟，咪就係多得康文署署長周達明平時對蟲蟻侵蝕及周邊結構闊佬懶理。更離譜嘅係，出咗事仲一味卸得就卸，冇好好咁吸取教訓，搞到全港樹木好似計時炸彈咁，都唔知幾時會再冧落嚟壓親人！

講開又講，周達明其實唔止管樹管唔掂，就連人命關天嘅泳池救生服務，一樣係管到亂七八糟。佢把口就話重視保障泳客安全，但有立法會議員質疑，國際標準係每個五十米嘅標準泳池要有四至六名救生員，但現時本港只係得三名咁大把咋，你話幾牙煙吖！

仲有，上月港島東游泳池有個當值救生員突然因急事請假，外判公司為咗湊夠救生員人數向康文署交代，居然求其搵個冇拯溺及救護資格嘅收費處職員頂住先，你話係咪兒戲吖？如果咁啱得咁蹺有泳客遇溺，都唔知會有乜嘢後果！

周達明廢成咁，孭鑊多過食飯，照計就算唔使炒魷，都要燉冬菇喇。但又奇噃，家陣佢唔止乜事都冇，聽聞仲有機會紮職做發展局常任秘書長添，真係天冇眼呀！

冇計啦，特區政府不嬲都係賞惡罰善。最明顯嘅例子係，本港醫療事故一單接一單，搞到咁多人枉死，食物及衞生局局長周一嶽應該落台都落唔切啦，但佢老哥唔單止賴死唔走，今年仲拎埋個金紫荊星章添呀！

反正賞惡罰善係特區官場嘅潛規則，計功夫茶話齋，不如出年玩鋪勁嘅，為周一嶽、周達明齊齊頒個大紫荊吖，笨！