立法會四年任期啱啱過咗一年，立法會議員李慧琼（Starry）就借議會放暑假空檔，聯同黨友、油尖旺區議員蔡少峰在大角咀開設聯合辦事處，尋日正式開幕，但遇正三號風球，驟雨不斷，好彩典禮期間短暫放晴。發展局局長林鄭月娥、教育局局長孫明揚及環境局副局長潘潔畀面撐場，Starry就把握機會玩突擊，向三個問責官員表達居民訴求。
Starry話，娥姐早前推出樓宇更新大行動，推動舊樓復修，但大角咀舊區就做得唔係好夠，希望讓更多大廈受惠。Starry「鵝」完娥姐，再「鵝」孫公，話區內好多校長反映該區未能全面實施小班教學，希望孫公畀學生多啲選擇喎。至於潘潔，Starry就更係想環境局加強大角咀舊區環境綠化啦！
今次Starry在大角咀開完第二個立法會議員辦事處，稍後計劃在愛民邨開設第三個辦事處。工作咁忙，難怪Starry話無時間陪愛女，諗住同女兒傾吓暑期活動安排，但因早出晚歸，返家時女兒已入睡。雖然Starry呢個媽咪無乜心肝，但她已下定決心抽時間帶女兒到迪士尼樂園或海洋公園玩餐飽。