扮嘢文尋日同田少出席自由黨喺東涌搞嘅齊抗金融海嘯活動，大家因為打風冇得坐纜車，但一樣有戲睇。扮嘢文一見田少就掹住佢咬耳仔，未知是否為加價解畫，又見佢同香港迪士尼行政總裁金民豪一齊派禮物畀遊客，又攬頭攬頸狀甚老友。

扮嘢文話同田少老友鬼鬼，已同佢解釋加價係無可奈何，海洋公園為擴建借落唔少錢，唔似得迪士尼有政府泵水；如果唔加價，每個月淨係蝕息都蝕到入肉，田少聽咗都好明白佢嘅處境喎。

不過明白唔等如接受，田少尋日繼續暗批海洋公園逆市加價，話經濟環境唔好，旅客揀旅行目的地好睇價錢，旅發局喺日本推廣香港，都要搵埋航空公司、酒店同景點合作減價吸客，擺明暗寸海洋公園加價趕客，變相倒旅發局米。大家應該記得，田少早前仲踢爆扮嘢文，話海洋公園用五十五億元擴建，但一半係政府畀錢，四分之一喺儲備度攞，只有四分之一要問銀行借，實質要還嘅錢唔多喎。尋日雖然唔再明刀明槍，但句句都係夭心夭肺！