平叔兩年前離開服務咗三十幾年嘅政府之後，多次撰文同公開發言月旦政事，包括高調批評煲呔曾施政，喺政壇引起一定回響，有人質疑佢有違退休高官「不在其位、不謀其政」嘅傳統，甚至話佢因為不獲煲呔曾重用，先至「反轉豬肚」狂鬧煲呔曾。不過其後發生嘅事實證明，政府嘅施政失誤真係一單接一單，煲呔曾嘅民望亦不斷插水，平叔純粹係先知先覺兼敢言，難怪佢喺政界同傳媒嘅人氣持續高企，仲受歡迎過佢做官嗰時。

不過，大家咪以為平叔好似某啲泛民主派咁，淨係有批評冇建設，佢仲好樂於向佢班前政府同事及香港新一代，傳授佢三十多年來嘅實戰經驗。平叔先後以兼職形式喺中大同港大教授政治及公共行政課程，平均每個星期講課四至六粒鐘，據聞仲大受學生歡迎，紛紛要求佢加碼教多幾科同增加課堂次數。

揀城大棄中大

近日我哋喺中環撞見平叔，佢話已經原則上答應城大邀請，教授一個公共政策及管理文學碩士課程，今次仲係全職工作添；由於唔想同時兼顧三間大學嘅課程，平叔決定放棄教咗兩年嘅中大兼職教席。平叔解釋，今次棄中大而取城大，純粹因為後者係教碩士生，報讀嘅學生有好多都係現職公務員或公營機構主管，有多啲機會直接用到佢啲實戰經驗，滿足感大好多。至於港大係佢嘅母校，點忙都希望繼續任教，就算畀人話佢親疏有別都一定唔會放棄喎。

不過平叔話，今次跳槽絕對同錢冇關，因為根據公務員規例，佢一有全職受薪工作就要停發長俸，一加一減收入其實相差唔遠。對於前日新鮮熱辣公布嘅離職公務員就業檢討報告，建議退休公務員執教鞭毋須停發長俸，平叔亦認為有一定道理，但由於佢本身有潛在利益衝突，都係少講為妙喇！