旅發局主席田北俊同海洋公園主席「扮嘢文」盛智文唔啱嘴形，早係公開秘密，田少前幾日更加開腔批評海洋公園加價唔合理，二人聽日冤家路窄，為齊抗金融海嘯大聯盟嘅消費優惠券第三波行動做主禮嘉賓，仲加多個香港迪士尼樂園行政總裁金民豪，三人肯定擦出火花，精彩過睇殺人鯨跳火圈。
由自由黨方剛發起嘅齊抗金融海嘯大聯盟，一連八個月嘅派發「消費優惠券」行動七月份進入第三波，主題係「夏日旅遊購物紛紛FUN」，主打吃喝玩樂，聽日舉行啟動儀式，唔知有心定無意，搵嚟三位對頭人主禮。
按安排，啟動儀式結束後，田少、扮嘢文同金民豪會一齊搭吊車上昂坪，小小纜車即時變困獸鬥戰場，論形勢，扮嘢文以一敵二，一嚟要防田少再鬧佢加價罔顧民情，二嚟又要同金民豪鬥搶鏡，威威海獅戰米老鼠，為海洋公園爭威。盛智文出名精於扮鬼扮馬博出鏡，金民豪點會唔知對手底蘊，佢又會出乜招數抗衡扮嘢文、為迪士尼爭一口氣？大家不妨拭目以待。