係人都知道黃宜弘鍾意飲酒，但原來佢成三十二歲仔先開始學飲酒。佢尋日喺立法會同卓妮講，自己後生時喺美國做專業工作，唔使逢場作戲傾生意，因此一直都唔識飲酒，直至三十二歲回流香港從商，畀人灌灌吓就愛上呢種嗜好，仲最鍾意飲烈酒茅台，嫌紅酒太淡，飲到飽晒都未夠喉。

問佢今晚會唔會同班帳委會委員飲鋪勁？黃宜弘開頭話馬會唔畀帶私伙酒入內，不過講講吓又自爆會放定啲茅台喺架車度，睇吓有冇機會偷運入去。不過佢話啲委員全部都係一杯起、兩杯止嗰隻，同佢一打打咁飲相差好遠。佢嘅最後希望就係上次冇嚟食飯嘅民建聯議員李慧琼，睇吓呢位帳委會唯一女將嘅酒量得唔得。

劉秀成幫疑似特首睇風水

卓妮尋日喺立法會又撞到「隱世風水師」專業會議議員劉秀成，立即問佢點睇三名疑似特首候選人嘅家居風水。佢話政務司司長唐英年嘅官邸喺正山頂，位置一流；財政司司長鬍鬚曾官邸嘅門口就有啲古怪，喺風水學嚟講係好大問題；至於行政會議召集人梁振英間屋佢就未拜訪過，無從評論。ＣＹ好快啲請劉教授返屋企睇吓喇！

卓妮