有一對仔女嘅范太話做父母有三大秘訣，第一係敢於認錯，范太話言教不及身教，父母做錯事一樣要同子女認錯，做好的模範。第二就係唔好做「黑白天鵝」，唔好對子女日哦夜哦，好煩㗎！范太話以前囡囡唱Ｋ，本來想叫佢早啲返，但佢知道一定唔啱聽，所以改個方式叫佢玩得開心啲，夜就打電話返屋企。最後一招係「提得起、放得低」，要負起照顧子女嘅責任，又要尊重子女決定。

Ann蔣唔介意老公一夜情

著名工業家蔣震嘅女兒蔣麗芸（Ann）都係講者。佢言論大膽，話結婚時同老公講明，即使佢對自己唔住，都唔會離婚；以一夜情為例，呢啲只係生理需要，就好似食咖喱、麻辣火鍋呢啲一剎那快感，同細水長流嘅婚姻無得比；阿Ann嘅老公尋日都在場，唔知佢點諗？阿Ann唯一覺得虧欠嘅男人，就係佢爸爸，因為爸爸好愛佢哋。阿Ann七兄弟姊妹好錫爸爸，每周日聚埋一齊，又搬埋同一個大型屋苑居住，等爸爸隨時搵到佢哋。阿Ann仲教大家千祈唔好怕肉麻，要不時稱讚父母，老人家好受落㗎！

尋日嘅主持係政壇新星葛珮帆（ＥＱ），佢話老公係佢最好朋友，當年佢有好多追求者，無人諗到好動嘅佢會同性格溫文嘅老公結婚。轉眼十七年，ＥＱ話依家見到老公仲有心跳感覺，在場嘅ＥＱ老公肯定冧晒！