維港早前舉行熄燈大行動，原來外號「黑英」嘅前天文台長林超英都有參加，黑英話維港熄燈少咗光污染，望上星空真係多咗啲嘢睇，由九龍半島望過港島上空，發現天色靚咗，顯得玲瓏剔透，遠眺銅鑼灣則是萬家燈火。
黑英回想一九六二年在英皇書院讀中二時，銅鑼灣建築物不多，自然較少光污染，維園入夜後黑過墨斗，在草地觀星確係一大樂趣。不過黑英話，正因為維園夠陰暗，亦成為情侶嘅拍拖勝地，全場就只有佢同一位男同學喺度觀星。至於觀星有無打擾其他情侶，黑英就無交代嘞。
天文望遠鏡唔係人人買得起，黑英讀中二嗰年就自製望遠鏡，到鴨寮街搜購菱鏡、接目鏡及一塊六吋反射鏡，但咁大塊反射鏡去邊度搵呢？黑英靈機一觸，買咗塊船艙窗門嘅圓形大玻璃，再用鋼沙磨到適合嘅弧度，單是買零件已用晒成份身家，於是嗰年暑假就邊度都唔使去，疊埋心水喺屋企磨玻璃。
經過一個暑假，黑英終於成功製作一支望遠鏡，非常自豪，但因為家居地方所限，黑英畢業後要留低支鏡喺學校，雖然唔係好捨得，但當係益吓啲師弟。現在科技進步，市民生活質素提升，買支望遠鏡絕非難事，但就少咗黑英嗰分製作望遠鏡嘅樂趣嘞。