已故船王包玉剛嘅長女包陪慶（Anna）自幼熱愛舞蹈，多年前在西環開設一間私人跳舞室Heavenly Dance，佔地七千呎，多年來吸引不少城中名媛闊太幫襯，作為舞林高手嘅Anna，當然都跳埋一份啦，但最近佢停咗跳舞，並非工作忙到無時間跳，而係佢話近期因為雙腳有啲毛病，所以逼住要暫停，相信要休息一排先至可以重出江湖。
Anna除咗熱愛舞蹈和音樂外，對兒童教育更加全情投入，繼八二年在香港創辦漢基國際學校後，由Anna策劃嘅上海包玉剛實驗學校亦於去年九月開學。Anna日前以前校董會主席身份出席演藝學院畢業禮時透露，她近期又忙於在上海籌建學校，提供幼稚園至中學一條龍升學，預期將會更加繁忙。Anna講過，包玉剛實驗學校係佢第二個仔，遲啲再有新校落成，豈不是又多個仔？
其實Anna在○一至○四年度擔任演藝學院校董會主席，為學院勞心勞力，學院於是在去年向Anna頒授榮譽博士學位，表揚佢對學院所作嘅貢獻，日前學院一年一度畢業禮，佢當然要出席捧場啦！