為喚起社會對正生書院問題嘅關注，有立法會議員近日自發組織籃球隊，下個星期六遠赴芝麻灣同正生學生鬥波，之後仲會一齊燒嘢食，暫時有七名男議員報咗名，其中全立法會最高嘅專業會議劉秀成將擔任隊長，隊員包括有番咁上下高嘅會計界陳茂波、資訊科技界譚偉豪同「大舊」陳偉業等，身材同球技成反比嘅何俊仁亦可能加入。
不過成隊球隊最奇怪嘅，就係搵咗經濟動力嘅「蘇菲梁」梁劉柔芬做領隊。蘇菲梁身高同何俊仁不相伯仲，好明顯並唔係打開籃球，唯一同體育有啲聯繫嘅係佢老公梁孔德，不過梁生都只係足總主席，唔係搞開籃球。
有議員就揣測，其實蘇菲梁本身好同情啲正生學生，但為免同身兼經濟動力顧問嘅鄉議局主席劉皇發唱對台，先至冇同其他議員一齊聯署撐正生，今次佢可能想做番啲嘢補鑊，做番個領隊撐正生，實情係咪咁，只有佢自己最清楚。