爭產案最近仲累到立法會梁展文事件專責委員會可能請唔到大狀。新世界發展董事總經理鄭家純同執行董事梁志堅早前多次向委員會發出律師信，仲搵咗前立法局主席、喺香港大律師名冊上排名第一嘅資深大律師施偉賢提供法律意見，話如果委員會堅持傳召佢哋作供，就會提出司法覆核挑戰立法會。

委員會為咗應付呢場法律戰，已經喺內部成立咗個四人法律小組，又搵緊律師行代表委員會應戰，但係就物色大律師方面遇到困難，原因係市面上有番咁上下實力同地位嘅民事案資深大律師，有近半都畀爭產案嘅與訟雙方請咗，無暇再接立法會呢單細官司；另外有幾位本身就已經係立法會議員，唔方便自己代表番自己；加上暑假臨近，好多大狀都預咗放假旅行或者返家鄉，令合適人選買少見少。立法會今次真係多得陳振聰唔少！