銅鑼灣時代廣場一帶人流絡繹不絕，好多名人都擔心行蹤曝光，但尋日下晝大約兩點鐘，我哋發現周一鑊明目張膽現身羅素街金朝陽中心，急步搭直上三十二樓潮人豪華髮廊hm Private i Salon，揀咗個近窗口嘅座位坐低。轉過頭見髮型師用類似保鮮紙嘅膠紙包住周一鑊個頭，頭頂放咗個熱風機，周一鑊就歎雜誌解悶。

「我根本無時間」

周一鑊個頭足足整咗接近兩個鐘，佢離開時見佢除咗吹咗個騎樓，個人睇起來精神啲外，根本睇唔出同尋日朝早去立法會答問題時有乜唔同，花咗兩粒鐘，佢剪髮定染顏色都唔多似。我哋問周一鑊係咪成日幫襯呢間潮人髮廊，點知佢竟然話係私人嘢唔講喎！既然係私人嘢，咁又點解用工作時間去呀？周一鑊就懶偉大咁話：「我根本無時間，連午飯都未食！」即係話自己一星期七日工作都好忙，根本無私人時間去理髮。

關於理髮呢啲私人問題，周一鑊話咗唔答，轉頭又答喎，佢話自己每三個月去飛一次髮，個師傅已經跟咗佢個頭十幾年，價錢收得好合理，落樓都唔使一千蚊。同政制及內地事務局局長林瑞麟嗰隻百零蚊洗剪吹相比，周一鑊個頭真係蚊髀同牛髀。三個月抽兩小時理一次髮都話無時間，完全因為本港醫療系統喺佢管治下，事故不斷，天天新款，佢自己為自己執手尾，工作時間和私人時間搞到亂晒龍。

打工仔一星期七日多勞多得，周一鑊就孭鑊多過乜，本港醫療政策在他執掌下，醫療事故頻生，近期最轟動就係東區醫院遺失嬰屍事件、發霉「別嘌醇」食死病人、明愛醫院對心臟病發病人見死不救、車禍重傷傷者送到醫院，又要家屬畀咗錢至救人等，總之搞乜衰乜，民怨四起。搞成咁，就算佢一星期做足七日，髮都唔剪成個野人咁，都無補於事喇。