廣州近日發生一單唔知好嬲定好笑嘅奇案。話說有一位姓林女司機，紅燈之前停車，突然有歹徒從車窗伸手搶手袋。啱啱有一個駕駛電單車嘅交通警員經過，林小姐即刻落車，坐上電單車後座，要求交警載住佢一齊追賊。追呀追，追呀追，最後的確係追到嘅，點不知，交警竟然拒絕落車捉賊喎，仲同林小姐咁講：「要追你自己追，我已經報警了，還想讓我怎樣？」膽小如鼠嘅執法者加多句：「我是交警，如果他有刀怎麼辦？」

警察居然唔敢捉賊，當然係嚴重失職，所以廣州市公安局宣布成立專責小組調查，強調廣州警隊絕不容忍民警漠視犯罪，將嚴懲不貸。

功夫茶之所以講呢個古仔，係想話畀大家聽，廣州警隊嚴懲民警漠視犯罪嘅態度係正確嘅，唔似得香港執法部門，漠視侵權歪風簡直當係奉旨。

○五年三月十五日，有一單譚姓一家四口食咗毒帶子不適送院嘅新聞，其中一張刊登於《東方日報》頭版嘅獨家照片，竟然被《蘋果日報》、《成報》、《星島日報》、《東周刊》等多間傳媒機構盜用。東方即刻向涉案嘅傳媒機構以及相關記者採取法律行動，同時又向警方、海關同埋廉署舉報。

等候執法部門捉賊期間，東方為咗討回公道，自費超過百萬元律師費，向涉案嘅傳媒機構以及擅自外洩照片嘅記者，提出民事索償。由於鐵證如山，包括《蘋果日報》在內嘅有關傳媒一早向東方賠償求和，至於涉案記者高潤添，日前亦被法庭判處敗訴。

好嘞，民事法庭都判咗東方勝訴嘞，執法部門有乜理由冇行動先？事實上就係咁荒謬，事隔四年咁耐，警方又冇行動，海關又冇行動，廉署又冇行動，完全係漠視犯罪。

關於呢個荒謬現象，「東方報業民意調查」結果顯示，三成九受訪者認為，香港現時侵權行為嚴重；兩成九更感到非常嚴重；認為有少少嚴重都有兩成二。

對於東方要花費超過百萬元循民事訴訟先至討回公道，三成三受訪者覺得，訴訟費昂貴，令升斗市民唔敢打官司；兩成九不滿《版權條例》保障唔到受害人；兩成八直斥政府保護知識產權係「講一套做一套」。

執法部門四年冇行動又點睇呢？三成一批評執法部門效率太低，難以打擊侵權行為；兩成七指摘部門失職，冇依法處理；兩成六更加質疑當局四年仍未投入資源調查，係選擇性執法。

呢嗱嗱嗱，公道自在人心呀，市民大眾都認為執法部門失職，功夫茶建議參考廣州警隊，唔該搵人嚴懲失職者！

話時話，執法部門遲遲唔捉賊，會唔會仲有一個原因呢？莫非佢哋都係膽小如鼠，唔敢得罪侵犯版權嘅不法分子？如果係咁，就確係眼冤咯，該煨！