人稱3L嘅立法會議員林健鋒（Jeffrey）、梁君彥同梁劉柔芬由年頭開始就一直吹風話聯合辦公室就快開張，仲話到時會有新名公布。3L尋日以聯署方式向傳媒發聲明講禁毒，三個代表工商界嘅議員有咁嘅舉動，無疑畀人無限想像空間，唔通三個人又行近一步，聯合辦公室真係好快就開張？
新聞稿嘅內容，三人分配得好平均，Jeffrey話暑假開始，青少年濫藥會更嚴重，梁君彥指佢哋支持加快推行校本自願藥物檢驗計劃，梁劉柔芬就補充，對伯裘書院校長譚萬鈞話一千零七十九名學生中只有七人吸毒，情況不嚴重嘅講法，感到好遺憾，因為「一個吸毒已嫌太多」。不過新聞稿冇提及會有乜跟進行動。
新聞稿署名嘅先後次序為林健鋒、梁君彥同梁劉柔芬，排名分先後嗎？根據Jeffrey嘅解釋，今次排位係跟英文字母順序排列，「林」（LAM）較「梁」（LEUNG）排得前，而梁君彥嘅英文名係Andrew，梁劉柔芬則叫Sophie，所以Andrew亦排先過Sophie。至於排名其實有冇其他玄機，就要等下回分解嘞。