腐朽係咪真係可以化為神奇？前年臨危受命，執掌燙手山芋昂坪纜車嘅張少華（Morris）可以力證。下個月就要離開「三碌拎」嘅Morris，雖然唔認返港鐵係升職做車務營運總管，但尋日就好自豪咁話，受到公司嘅賞識，全靠自己夠多事！
Morris喺港鐵廿六年，佢笑自己成日不務正業，鍾意搞搞震。當年做車輛經理，內部維修至係分內事，點知佢○五年開始有六、七成時間都飛咗去英國、瑞典同公司傾營運合約，又左諗右諗點樣將公司維修經驗當產品咁賣，幫當時嘅地鐵諗埋點樣搵多啲錢。
Morris直言自己係一個複雜嘅工程師，不甘於困於工程框框，鍾意不斷思考，諗吓點樣令團隊再發揮得盡啲，隔幾年就主動提議調職。今次臨走前，度咗架大賣嘅「水晶車」，仲嫌未夠喉，話「三碌拎」仲有大把發展潛力，尋日話要倣效「女僕餐廳」出「女僕車」，擺個靚嚮導喺車廂，當個客係主人咁介紹沿途風光。此話一出當堂令男旅客眼睛發亮，但Morris即時表明，「女僕車」嘅諗法純屬吹水，不過將諗法實現，都冇乜唔好吖。