自去年立法會選舉失利後同公民黨愈行愈遠嘅譚香文（Mandy）已正式遞交退黨信，準備喺聽日五十二歲生日時重新出發。Mandy話有老牌政黨以前都唔重視落選議員嘅地區工作，但呢幾年從錯誤中學習，積極為落選議員備戰，反而新政黨就無呢個觸覺，對落選議員照顧不足。雖然成個比喻都無點名，但Mandy口中嘅新政黨都呼之欲出啦。
至於點解遲唔退、早唔退，依家先嚟退？Mandy話如果上年落選即刻退黨，畀人唔夠深思熟慮嘅感覺；如果等遲啲選舉前先退，又好似太功利，依家退就啱啱好。回復自由身嘅Mandy話當年都係以獨立候選人身份取得區議會同立法會嘅議席，依家嘅經濟、政治環境同○三年不遑多讓，煲呔曾有可能隨時頭痛、腳痛，睇嚟對自己嘅政治前景一片樂觀。
退黨後嘅Mandy密鑼緊鼓寫自傳，準備書展出書，大爆「政黨的內外角力以及罕為人知的人脈關係」嘅秘聞。對於Mandy決定退黨，公民黨亦好大方，發新聞稿話對Mandy退黨深感惋惜同遺憾。唔知幾位大狀遲啲睇完本書又會點諗呢？