鬍鬚曾上月「派糖」派到怨聲載道，被市民鬧閉門造車，幫唔到窮人，就咁用咗一百七十億元，所以派完糖就雞咁腳外訪避箭，唔肯面對批評聲音。鬍鬚曾一心要做廿一世紀港版阿Q，逃避現實，就算去到俄羅斯，率商界代表團參加經濟論壇，呢種心態一樣表露無遺。

攞金融風暴比較

電子傳媒尋日引述鬍鬚曾話，面對金融海嘯，港府上年開始連環派糖，相比嚟講，九八年金融風暴時，頭六個月唔見咗四萬幾個職位，而今次金融海嘯只係流失咗三萬幾個，證明港府嘅「重民」措施有效，言下之意，即係佢好滿意依家香港嘅境況，十九萬人失業，大家應該額手稱慶；香港失業率上到四十一個月嚟新高嘅百分之五點三，港人應該跪地感恩，多謝佢英明神武。

鬍鬚曾仲話，○八年到依家，港府派糖累積使咗七百幾億元，佔香港本地生產總值嘅百分之五點二，今年應該足夠咁話，即係閂定後門，叫市民下半年唔使旨意佢再派糖嘞。鬍鬚曾上月派糖時，明明開咗一張空頭支票，話視乎經濟同失業情況，港府仲可能有下一輪派糖措施，甚至不斷加碼，言猶在耳，鬍鬚曾咁快出彈弓手，收番派糖承諾，佢揀喺外訪期間先至夠膽講，相信都係怕被升斗市民追擊啦！

香港經濟飽受金融海嘯衝擊，打工仔朝不保夕，失業人數達十九萬人，四月比三月時再多九千七百人飯碗不保，鬍鬚曾身為財爺，面對呢堆數字，應該感到慚愧至啱，但係聽佢嘅語氣，好似覺得三萬個工作職位流失，只不過係小事一樁，不痛不癢，仲顛倒黑白，攞嚟認叻，咁嘅政府，話會以民為本，邊個會信？