香港呢幾日嘅天氣一日比一日悶熱，空氣質素又唔多好，唔想再咁落去，大家有必要提高環保意識。有慈善機構尋日同港鐵合辦綠「識」日，宣傳環保由生活開始嘅意識，但凡捐出六十蚊或以上嘅港鐵乘客，會獲贈綠「識」日紀念套票，喺港鐵指定嘅交通工具無限次使用。身為慈善機構籌募委員會聯席主席嘅太古（中國）主席陳南祿（Philip），尋日抽空出席喺港鐵中環站舉行嘅開展儀式。儀式上午舉行，但Philip到場時滿頭大汗不特止，半邊身都濕晒，狀甚狼狽，不時要攞手巾出嚟抹汗。
原來活動開始前已經喺中環嘅Philip行路嚟，佢話平時嘅活動範圍，主要係中環同位於金鐘嘅辦公室，所以盡量都以港鐵代步，環保啲嘛！佢見大家唔信佢會坐公共交通工具，即時話：「我張八達通仲殘過你嗰張呀！」隨即喺銀包拎張八達通出嚟展示，果然殘得緊要，成張卡甩咗一半色咁滯。
除咗以港鐵代步減少廢氣，Philip亦好注重減少廢物。佢話平時食飯盡量唔叫太多嘢食，費事食唔晒嘥喎；即使食剩嘢，佢都一定唔會客氣，打包拎返屋企食。環保要由生活入手，Philip果然係一個好榜樣！