立法會商界議員黃宜弘（Philip）同太太梁鳳儀恩愛就大家都知，好似早前為結婚十四周年紀念舉行盛大晚宴；唔講唔知，原來兩人連首飾都兩份用。Philip不嬲都西裝骨骨，仲係三件頭西裝嗰隻，一睇就知係精心配搭。早前喺立法會見到Philip，發覺佢扣住西裝背心嘅袋鏈有一個心形嘅玉墜，晶瑩剔透，真係連袋鏈都特別過人。Philip話個心形玉墜已經跟咗佢十幾年，原來係人稱「白頭莫」嘅金融界元老莫應基太太所送。
莫應基太太竟然送個心形玉墜畀佢，莫非有特別意思？非也！Philip即刻耍手擰頭話，千祈唔好誤會，係就係莫太送，不過唔係送畀佢，而係送畀太太梁鳳儀。黃太係名作家，唔使講一定好有創意，起初仲以為將佢用作袋鏈係黃太嘅意思，點知原來係Philip自己設計。Philip話，有日太太喺首飾盒拎咗個玉墜出來，佢見到個玉墜幾靚，又覺得用緊嘅袋鏈比較簡單，無咩特色，於是諗到將兩者併埋一齊，估唔到幾好睇，所以一用就用咗十幾年。睇喺Philip唔單止對太太長情，連太太嘅身邊物都雨露均沾。