香港最新出口數字急跌兩成，商家佬都喊晒口，可惜政府翹埋手唔多理，市民惟有自求多福。玩具大王蔡志明太太蔡李惠莉就話歐美定單減少，要改變生意策略，由出產高價玩具改為推出中價貨吸客。
蔡太尋日撇低老公，同囡囡蔡加怡入沙田馬場為愛駒「靚太陽」及「萬能駒」打氣，母女二人有默契地戴上型女黑超，企喺貴賓廂做啦啦隊，眼見愛駒衝線在望，一度興奮地高呼吶喊，可惜兩駒分別喺唔同場次跑第二，始終同頭馬無緣，但計落獎金合共有廿幾萬，都算幾和味。
問佢會否攞筆獎金同家人旅行慶祝，蔡太話家人平時各有各忙，只有新年先可以聚埋一齊外遊，暑假好少出門喎。又係嘅，呢排生意難撈，蔡太都要留守香港諗計度橋，佢話公司以往以生產高價玩具為主，眼見市道不景氣，惟有轉攻中價貨色。所以話呢，香港人轉數真係快。