經濟走下坡，公司為咗縮皮，裁員之聲四起，啱啱前日亞視又地震裁減三十六人，新聞部成重災區。尋日喺中環遇到亞視執行主席張永霖（Linus），佢話現階段難以向員工承諾啲乜嘢，但就拍心口話由現階段直到年尾都會穩定落嚟，意思係裁員潮到此為止。佢又再三強調裁員係公司嘅決定喎！
問Linus點解要揀新聞部落手？佢就話過去被裁嘅員工多數係新聞部以外嘅部門，但因為亞視取消咗二十四小時新聞台，所以要重整部門人手。亞視大瘦身，連帶Linus自己都要瘦身，事關尋日見佢明顯消瘦咗，Linus話：「係呀！消瘦咗好多，無辦法啦！」莫非依家份工好難打？抑或炒人心情沉重搞到消瘦呢？Linus就一味苦笑，然後行去酒店食午飯。
