離任在即嘅科大校長朱經武近日爭取機會出席校園活動，尋日有新學生宿舍舉行命名禮，朱校長直踩宿舍帶傳媒參觀。佢趁機分享當年住台灣成功大學宿舍嘅經驗，話二百幾呎房間內擠滿八個宿生，有來自越南及柬埔寨學生，但彼此相處融洽，唔會爭枱讀書。
佢又大爆當年宿舍唔准煮食，但有同房偷偷走去儲物房搭電線煮臘腸飯，食到大家津津有味。朱校長又透露頑皮軼事，話大學時曾偷偷用錄音機錄低校長講話，返到宿舍後模仿對方口脗，引來宿生哈哈大笑。
讀書時係百厭星嘅朱經武，領導科大後令排名節節上升。國際高等教育資訊機構QS（Quacquarelli Symonds）首次公布亞洲大學排名榜，科大榜上有名，位列第四，與位列第一嘅港大及第二嘅中大平分秋色。對於頻頻上榜，朱校長話上榜令科大師生好鼓舞，但佢個人唔係太看重排名，有冇份上榜一樣咁開心。
教育局局長孫明揚就對香港有三所大學位列排名榜前五位感到欣慰，佢話，排名顯示香港嘅專上教育成就，有助加強香港作為區內教育樞紐地位。