世事有好多自相矛盾，或者自製矛盾嘅謬象，煲呔曾提倡發展六大產業，其中將文化同創意產業綑綁埋同一組處理，就係一例。
經機會文化及創意產業小組尋日請班業界翹楚腦震盪，小組召集人梁振英（ＣＹ）會後總結，指會上好多人講起網絡遊戲呢門大生意，有業界透露，將新研發嘅網絡收費遊戲放上網，五分鐘就回本，香港極有發展空間。
矛盾嘅地方係，如果港府大力推動網絡遊戲，香港青年個個匿喺屋企或者去網吧打機，第日香港咪會變成電車男當道？香港嘅公民教育何去何從？中央政策組首席顧問劉兆佳承認，會上都有文化界人士提出呢個問題，要再從長計議。咁即係點？即係佳叔都被呢個難題考起囉。
進念二十面體嘅胡恩威雖然身為小組召集人之一，尋日照彈港府其身不正，扼殺創意，佢舉例，好似起公屋咁，港府一味以投標價低者得，唔理設計有冇創意，搞到間間公屋好似倒模咁款。按胡恩威嘅邏輯，創意產業同以價低者得起公屋，又係自相矛盾嘅另一例證。