立法會會計界代表陳茂波（Paul）尋日同記者茶敍，戴上一條印滿心形圖案嘅領呔，仲甜絲絲咁同記者講係太太送嘅禮物。舊年立法會選舉時輸咗畀阿Paul嘅龔耀輝近日被爆與電視台女主播交往斷正，阿Paul雖然好厚道冇公開批評，不過單係佢提起心心呔時嘅模範老公模樣，乜都唔使講就已將新一代賤男比下去。
龔耀輝雖然曾經係阿Paul嘅競爭對手，不過同行有難，作為業界代表嘅阿Paul都好「盡責」提供協助，幫口箍煲：「如果（龔耀輝）知錯能改，希望佢太太會原諒啦！」又話：「一個人做錯事要畀機會佢，唔應該咁就從此刪除呢個人。」偷食斷正仲肯幫佢兜，唔通阿Paul想喺下屆立法會選舉時攞埋龔耀輝嗰票？
話時話，阿Paul自從做咗立法會議員後真係搏到盡，一個人坐三個立法會事務委員會，連佢都話「忙到癲」，所以阿Paul已經同「五散人」夾好由下個立法年度起分工，五個人分坐唔同嘅事務委員會，減輕工作量。