本文重點
環球股市小陽春，香港恒生指數尋日又升四百點，市場憧憬金融海嘯喘定。不過，長江製衣董事總經理陳永棋話齋，全球金融危機係稍為喘定，但紡織界過去兩個月出口定單急跌，比去年同期大跌兩、三成，由此可以睇到全球消費疲弱引發嘅危機好快殺到嚟，大家咪樂觀得咁早喎！
恒指連升五日，氣勢如虹，正當市場沉醉亢奮情緒之際，卓妮前兩日喺中環碰上全國政協常委陳永棋，被棋哥一席話警醒，覺得好值得同大家分享。棋哥話，股市向好，佢都受惠，事關佢早前喺滙豐徘徊喺股價五十蚊水位時，趁低吸貨，依家滙豐升過六十幾蚊，佢都有斬獲。不過，佢唔敢因而沖昏頭腦，事關佢睇到，香港另一場經濟危機已經撲到。
環球消費疲弱
棋哥分析，金融海嘯去年九月爆發，當時市場人人自危，但紡織界整體情況尚算ＯＫ。點知到咗農曆二月之後，環球定單突然急速下滑兩至三成，情況相當驚人，跌勢至今未止，呢啲情況，外面嘅人仲未知，但行內人一睇就知大件事，環球消費疲弱嘅破壞力開始浮出水面，香港經濟何時復甦，佢依家真係唔敢講。
棋哥估計，一啲經營不善嘅廠，可能捱唔住要倒閉，有創意、有實力嘅先至可以留落嚟，捱過經濟嚴冬，成為經濟洗牌嘅得益者。嘩，聽棋哥咁講，香港未來幾個月咪好關鍵！咁棋哥間長江製衣屬邊一類？佢好有信心話：「梗係守得住嗰隻啦！」
卓妮