豬流感殺到香港唔夠一星期，學生哥尋日就要揹書包返學，家長都咪話唔擔心。教育局副局長陳維安（Kenneth）唔敢偷懶，尋日撥咗唔夠半個鐘去灣仔區一間小學，睇吓學校嘅抗疫措施夠唔夠。嘩！搵到確診個案嘅維景酒店咪喺灣仔囉，唔驚中招呀？咁又唔使驚，間小學離維景酒店夠晒遠，行過去都要成廿分鐘。
Kenneth一到學校，就做個樣板畀學生睇，入門口洗洗手。學校喺大門設置咗個自動洗手機，擺對手埋去就會自動噴消毒液。Kenneth一伸手就吸引成班攝記大哥狂影相，佢有求必應，等班大哥影夠為止；結果當局呼籲市民洗手十五秒，佢足足擺對手喺度成分鐘，捧住晒啲消毒液唔知點好，多對手都搽唔晒。又好彩隻消毒液唔會起泡，如果唔係「搞到一鑊泡」，就認真唔好意頭！
洗完手，咁啱一班小二學生上完體育堂，一窩蜂排隊洗手，Kenneth就哄埋去睇吓佢哋點洗，又問吓班學生知唔知體溫過咗幾多度唔好返學？點知其中一位學生哥竟然答「九十九度！」即係計華氏嗰隻，當堂令Kenneth打咗個突。
不過佢都好快回過神，教番小朋友話，正確嘅答案係過咗攝氏三十七度就唔好返學啦！