有「飛天朱」之稱嘅前港區人大代表朱幼麟一向鍾情刺激運動，已屆花甲之年仍然熱愛玩滑翔傘、深海潛水、賽車，原來佢仲係神槍手。五月初「飛天朱」喺菲律賓實用射擊賽中，揮低一眾後生仔，喺Level3級別標準組中勇奪冠軍。
近年已淡出政界嘅「飛天朱」仍未停落嚟，雖然唔再過問政事，但講到玩佢仍然係專家。飛天朱日前跟隨香港實用射擊總會一行十二人，前往菲律賓參加為期三日嘅射擊大賽。香港人或者對實用射擊有啲陌生，查實已故巨星張國榮主演嘅《鎗王》，就係以實用射擊為題材，呢種射擊同奧運比賽嘅氣步槍射擊有啲唔同，槍手唔會預先知道眼前有幾多個靶，亦唔會知道標靶所在位置，一切講求臨場應變，幾考反應力同眼力。
咪睇「飛天朱」身形肥嘟嘟，佢喺射擊場跑起上嚟敏捷過唔少後生仔，理由好簡單，因為佢有廿五年槍齡，揸槍多過食生菜，射中目標又點會難倒佢呢。不過講到今次獲獎，「飛天朱」話可以為港人爭光，好開心喎，下星期會請晒成班戰友食餐飯慶祝添！