唔好睇小加價百分之二，試問今時今日打工仔邊個有幸加薪百分之二吖？唔使減薪已經偷笑咯，唔使失業更加要還神。好衰唔衰，家用石油氣用戶好多都係公屋居民，你知啦，公屋居民係草根階層，加價百分之二對佢哋嚟講唔係嘢小㗎。
唔使問阿桂，油公司嘅加價藉口一定係國際油價回升。對於呢個永恒嘅藉口，香港人聽到厭，因為油公司永遠係「加快減慢」。國際油價上升咩，佢哋嘭嘭聲將零售價提高，國際油價下跌咩，佢哋即刻以超慢動作處理，慢——到——好——似——蝸——牛——咁——慢——
其實，唔止加快減慢，油公司仲識得出蠱惑，就係「加多減少」嘞。由立法會議員王國興帶領嘅能源壟斷關注組計過數，過去三年家用石油氣價格飄忽，上上落落好似「海鮮價」，之不過咁，零售價嘅加幅永遠高過進口價，整體嚟講係高出五成。過去三年嘅加價總和，進口價每千克加咗十一元一角七分，零售價居然加咗十六元八角六分。一句到尾，油公司三年來一直牟取暴利！
咦喂喂喂，政府成日話要提倡公平競爭，仲有個爛鬼平機會鼓吹平等機會，石油氣用家可唔可以轉用其他燃料呀？唔用海鮮價石油氣，有冇平等機會轉用價格相對穩定嘅煤氣呀？對唔住，如果你係公屋居民，你係冇機會嘅，因為房屋署唔知係戇居定係搵笨，一早同油公司簽咗年期長到無倫嘅合約。根據能源壟斷關注組查證，房署與家用石油氣供應商嘅合約年期係十五年，如果供應商冇過失，房署就會續約，每次續約年期係十年。好明顯，油公司只要同房署簽咗合約，就處於一個擁有絕對優勢嘅壟斷局面。
簽咗長命約都未算，公屋嘅設計更加令到居民冇得選擇，因為所有地下供氣管道一早鋪好晒，你想放棄石油氣轉用煤氣咩？大工程咯，成個供氣系統要剷起，然後重鋪。
講到呢度，大家明唔明點解油公司咁把炮？因為有政府撐腰吖嘛，油公司咪冇有怕囉。所以話啫，用家肉隨砧板上，油魔一於撳住搶！
提起油魔，功夫茶諗起早前運輸業界發起嘅「餓死油魔」杯葛行動。唉，相對嚟講，車用燃油嘅用家已經算得上比較幸運，起碼幫襯邊間油公司都叫做有得揀，咁先至有空間採取杯葛行動吖嘛，公屋居民就完全冇得揀嘞，想杯葛咩？除非回復阿爺年代，用火水爐煮飯啦！
唔想家用石油氣撳住搶，唯一嘅希望係戇居政府唔再容許油魔搵笨，起碼唔好畀油公司加多減少吖，唔該！